Khua git gai pơ ala mơnuih ƀôn sang dêh čar Vương Đình Huệ hăng grup hyu mă bruă pioh mông hơ-ŭ hơdor, lăng yôm hơdôm tơlơi gum pơgôp prong prin mơng Khua git gai pơ ala mơnuih ƀôn sang dêh čar hơđăp Nguyễn Hữu Thọ hăng bruă ngă hơkrŭ mơng Ping gah, kơnuk kơna hăng Ƀirô Khua pơ ala mơnuih ƀôn sang dêh čar. Bơră ruai tom ơi Nguyễn Hữu Chân, ană đah rơkơi kơ Khua pơ ala mơnuih ƀôn sang hơđăp Nguyễn Hữu Thọ, Khua git gai pơ ala mơnuih ƀôn sang dêh čar Vương Đình Huệ hơdor glăi thun blan yôm phăn amăng tơlơi hơdip hăng bruă mă mơng Khua git gai pơ ala mơnuih ƀôn sang hơđăp Nguyễn Hữu Thọ.

Khua git gai pơ ala mơnuih ƀôn sang pơpŭ thun phrâo hiam klă hloh kơ sang anŏ Khua git gai pơ ala mơnuih ƀôn sang hơđăp Nguyễn Hữu Thọ; čang rơmang sang anŏ amra tŏ tui gru grua, pơgôp amăng pơjing hăng wai pơgang lŏn ia, đing nao, pơgôp hiăp brơi hơdôm bruă mă mơng Ƀirô Khua pơ ala mơnuih ƀôn sang dêh čar.