Khua git gai pơ ala mơnuih ƀôn sang dêh čar ơi Vương Đình Huệ nao jơnum ngui hrŏm. Anai lĕ tal pơphun yôm phăn, jing hrơi mông kiăng Sơn La hăng hơdôm boh tơring čar kual Yŭ kơdư lăi pơthâo kơphê Arabica; pơpŭ ƀing mơnuih pla, pơkra pơjing, sĭ mơdrô pơ tač rơngiao kơphê; pơgôp pơđĭ kyar kual pla kơphê Arabica hiam hơdjă, hơđong kjăp. Ră anai, kơphê Sơn La hơmâo ba sĭ mơdrô pơ 20 boh dêh čar kual EU, kual kơdư Mi, Trung Đông hăng hơdôm boh dêh čar kual ASEAN hăng rơnoh pơhrui glăi hơđong, lu hloh; pơgôp hrưn đĭ prăk pơhrui brơi mơnuih pla, pơkra pơjing, hơmâo dong bruă mă, pơgôp pơplih amăng pla pơjing hiam hơdjă hăng đĭ nua kơphê ƀơi Sơn La.

Ƀrô amăng blan djru mơnuih ƀun rin thun 2023, Khua git gai pơ ala mơnuih ƀôn sang dêh čar ơi Vương Đình Huệ hăng grup hyu mă bruă hơmâo pơtrut pơsur, jak iâu pơgôp mơng ƀing čơmah hơmâo man pơdong 100 boh sang kiăng djru brơi sang anŏ ƀun rin sang tơ̆i rơ̆i amăng tơring čar Sơn La. Hlâo anun, Khua git gai pơ ala mơnuih ƀôn sang dêh čar ơi Vương Đình Huệ hăng grup hyu mă bruă hơmâo nao tŭi ñang, dưm guang bơnga ƀơi pra yang wa Hô-tơdron lak Yŭ kơdư, tơring čar Sơn La.