Khua git gai pơ ala mơnuih ƀôn sang dêh čar ơi Trần Thanh Mẫn đăo kơnang tal rai čuă amra jing gru pơđom pioh yôm phăn, pok tơbiă sa rơwang phrâo kơ tơlơi rô nao rai Việt Nam – Thái Lan. Khua git gai pơ ala mơnuih ƀôn sang dêh čar rơkâo dua bơnah amra mă yua đut hlah anô̆ gal pơhrua nao amăng hơdôm bruă kah hăng bơwih ƀong mrô, apui yua hơdjă, pơlir bruă blơi sĭ ƀơi kual hăng bruă đang hmua tui hơdră phrâo, tŭ yua đut hlah hơdôm tơlơi pơkôl sĭ mơdrô mơ-ak klă, kah hăng Tơlơi pơkôl gum hrŏm bơwih ƀong pơhlôm abih bang kual (RCEP) pioh hmâo tơhnal prăk pơhrui glăi mơ̆ng gơnam sĭ kơ dêh čar tač rơngiao hmâo 25 klai dolar Mi amăng thun 2030.

Khua dêh čar Thái Lan yă Peatongtarn Shinawatra brơi thâo bôh than tal rai čuă Việt Nam anai pioh lăi pơthâo nao rai hăng ƀing khua mua dêh čar Việt Nam kơ hơdôm bruă kơtưn gum hrŏm kơplah wah dua bôh dêh čar pơ̆ anăp, biă ñu bruă bơwih ƀong, tuh pơplai hăng sĭ mơdrô pioh ngă brơi tơlơi rô nao rai dua bôh dêh čar truh rơnoh dlông phrâo./.