Khua git gai pơ ala mơnuih ƀôn sang dêh čar ơi Trần Thanh Mẫn pơdah tơlơi hok mơ-ak lơm ƀuh tơlơi rô nao rai Việt Nam-Japan hơmâo tơlơi pơđĭ kyar hiam klă tơdơi kơ rơbêh 50 thun akŏ pơjing tơlơi rô nao rai pơtom hiăp hăng bruă dua bơnah hrưn đĭ jing bơnah “Ngă hrŏm yôm phăn djop mơta yua tơlơi rơnuk rơnua hăng pơdrong asah amăng kual Asia hăng rŏng lŏn tơnah”; lăi pơtong, pran đăo gơnang bruă kơđi čar kơplah wah dua bơnah jai hrơi hơkrŭ kjăp.

Amăng mông bưp, dua bơnah pơsit tong, lăng yôm tơlơi rô nao rai kơplah wah dua Ping gah Cộng sản Việt Nam hăng Ping gah Cộng sản Japan; sit biă ñu pơtrut kơtang pơbưp nao rai kơplah wah khua mua pơprong hluai tui bruă pơphun tui tơlơi gal, sit biă ñu kơplah wah ƀing khua mua dŏ hlăk ai; tŏ tui, hrưn đĭ tŭ yua hơdră bruă pơlăi nao rai boh thâo, tơlơi pơmĭn kơ bruă amăng jar kmar hăng amăng kual, kơ bơh tơhnal hăng tơlơi sit nik pơjing hơdră chủ nghĩa xã hội ƀơi dua boh dêh čar hăng rŏng lŏn tơnah.