Dua bơnah hok mơak ƀơi anăp tơlơi rô nao rai ngă hrŏm jao hrơi kjăp tui, sit nik kơplah wah dua Anom bruă pơ ala mơnuih ƀôn sang, lăng yôm bruă čih giong hơdrôm hră “50 thun rô nao rai Ƀirô khua pơ ala mơnuih ƀôn sang dêh čar Việt Nam - Lao” amra hơmâo in pơkra, ba pơƀuh amăng thun 2025 anai mơn.

Dua čô khua tĭ ư ba tơlơi rô nao rai kơđi čar dlăm hloh, ngă hrŏm kơtang hloh amăng bruă bơwih ƀong, sĭ mơdrô, apui ayuh, logistics; pơtrut bơbưp mơnuih ƀôn sang, biă ñu rơnuk hlăk ai, kiăng bơbă tui tơlơi ngă giăng mah yôm kơplah wah Việt Nam hăng Lao. Khua git gai pơ ala mơnuih ƀôn sang dêh čar ơi Trần Thanh Mẫn kiăng dêh čar Lao ngă gêh gal brơi hloh kơ anom bơwih ƀong Việt Nam tuh pơ alin. Dua bơnah ăt tŭ ư lăi pơthâo nao rai tơlơi thâo thăi akŏ pơjing Ping gah, dưm dăp giong anom bruă kơđi čar, amăng anun hơmâo Anom bruă pơ ala mơnuih ƀôn sang, ngă kjăp tui tơlơi gum pơgôp Việt - Lao.