Amăng jơnum lok 2, Khua pơ ala mơnuih ƀôn sang dêh čar tal XVI him lăng pơphun giăm 30 hrơi. Đĭ pơhiăp amăng mông pok pơphun, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, amăng jơnum lok anai pơphun lăng glăi Jơnum lok blung a hăng pơgôp hiăp tal blung a kơ bruă prap lui jơnum lok 2, Khua pơ ala mơnuih ƀôn sang dêh čar tal XVI. Khua git gai pơ ala mơnuih ƀôn sang dêh čar rơkâo sem lăng tơpă kơ bruă dưi ngă, aka dưi ngă, pơsit tong ten boh tơhnal kiăng pơplih mơtăm mơng jơnum lok 2, anăm brơi lok glăi kơ bruă kaih mơ-it hră pơ-ar, bruă ngă soh glăk amăng jơnum lok blung a rơgao.

Khua git gai pơ ala mơnuih ƀôn sang dêh čar rơkâo hơdôm anom bruă mơ-it lăi pơthâo, anom bruă čih pơkra lăng glăi, ngă rơđah tơlơi glăm ba; Khul djuai ania, hơdôm jơnum min, anom bruă Khua pơ ala mơnuih ƀôn sang dêh čar gum hrŏm, pơtrut pơsur, kiăo tui lăng hrơi mông ngă, hmao tlôn lăi pơthâo Jơnum min apăn bruă Khua pơ ala mơnuih ƀôn sang dêh čar.