Pơhiăp ƀơi mông Jơnum, ơi Trần Thanh Mẫn brơi thâo, anai jing tal jơnum blung a mơ̆ng blan 1/2026, pơphun amăng hrơi dêh čar ta glăk hok mơak čơkă Jơnum ruah khua ping gah dêh čar tal 14 hăng Ngă lơphet 96 thun hrơi akŏ pơdong Ping gah Cộng sản Việt Nam; čơkă Tê̆t thun phrâo tui tơlơi phiăn djuai ania ta.

Ƀơi mông jơnum, hră lăi pơthâo mơ̆ng Jơnum min wai lăng djŏp tơlơi rơkâo đĭ mơ̆ng mơnuih ƀôn sang hăng Krăp lăng brơi thâo, mơnuih ruah khua hăng abih bang mơnuih ƀôn sang đăo kơnang kơ tơlơi git gai mơ̆ng Ping gah amăng bruă ba lŏn ia ta đĭ kyar, ngă truh kih djŏp tơlơi ba tơbiă; pơtŏng glăi bruă ngă hrŏm plah wah Khua mua pơ ala hăng Kơnuk kơna amăng bruă čih pơkra tơlơi phiăn, čih tơlơi pơtrun djru mơnuih ƀôn sang hăng ngă tui, kiăng hơmâo abih bang mơnuih tŭ ư, ngă bruă tŭ yua amăng wai lăng kơnuk kơna. Khua git gai pơ ala mơnuih ƀôn sang dêh čar kiăng Jơnum min wai lăng djŏp tơlơi rơkâo đĭ mơ̆ng mơnuih ƀôn sang, krăp lăng, hrŏm hăng hơdôm anom bruă krăo lăng nua gơnam, hơdôm mơta gơnam juăt blơi lu hloh amăng hrơi Tê̆t Bính Ngọ đah mơ̆ng hơđong, djŏp kơ mơnuih ƀôn sang; lăp đing nao hloh bruă rơnuk rơnua, hơđong, kơđi čar hlâo, amăng hăng tơdơi kơ hrơi Jơnum ruah khua ping gah hăng bơyan ƀong Tê̆t.