Tlam lơ 1/4, ƀơi Ƀirô mă bruă, Khua git gai pơ ala mơnuih ƀôn sang dêh čar ơi Trần Thanh Mẫn git gai Jơnum lok 56 mơng Jơnum min apăn bruă Khua pơ ala mơnuih ƀôn sang dêh čar. Đĭ pơhiăp amăng mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, sa boh tơhnal yôm phara lĕ tơlơi pơgôp hiăp prap lui bruă ruah mơnuih apăn bruă mơ-it nao Khua pơ ala mơnuih ƀôn sang dêh čar amăng jơnum tal blung a, Khua pơ ala mơnuih ƀôn sang dêh čar tal XVI; rơkâo bruă anai kiăng prap lui kjăp phik, tong ten, pơhlôm djơ̆ hăng tơlơi pơkă. Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, Jơnum min apăn bruă Khua pơ ala mơnuih ƀôn sang dêh čar amra pơgôp hiăp amăng hơdôm boh tơhnal yôm phun, amăng anun hơmâo črăn tơlơi phiăn čih pơkra, pơhrua sa, dua črăn amăng tơlơi phiăn hră pơhlôm nua mơnuih mơnam.

Jơnum min apăn bruă Khua pơ ala mơnuih ƀôn sang dêh čar pơgôp hiăp tal rơnuč kơ bruă prap luui jơnum tal blung a, Khua pơ ala mơnuih ƀôn sang dêh čar tal XVI hrŏm hăng hơdôm tơlơi gal pơhlôm bruă mă mơng Ƀirô Khua pơ ala mơnuih ƀôn sang dêh čar pơ anăp anai, mơng gơnam măi mok truh pơ hơdôm hơdră bruă bơdjơ̆ nao. Laih dong, jơnum amra pơgôp hiăp kơ hră lăi pơthâo boh than mơng jơlan hơdră krăo lăng thun 2025, hơdôm blan blung a thun 2026 hăng him lăng jơlan hơdră krăo lăng thun 2027 kiăng mơ-it Khua pơ ala mơnuih ƀôn sang dêh čar.