Tom brơi, lơ 18/11, Khua git gai pơ ala mơnuih ƀôn sang dêh čar ơi Trần Thanh Mẫn hmâo kĭ Tơlơi pơtrun pơsit mrô 1297 mơ̆ng Jơnum min apăn bruă Khua pơ ala mơnuih ƀôn sang dêh čar pơdŏng Grŭp črâo ba klah čun bruă ngă tui Tơlơi pơtrun pơsit mrô 18 lơ 25/10/2017 mơ̆ng Grŭp mă bruă Ping gah dêh čar tal 12 – Sa dua mơta tơlơi pơplih phrâo dong, dưm dăp bruă mă mơ̆ng glông bruă kơđi čar rơguăt, mă bruă tŭ yua, ba glăi bôh tơhnal ƀơi hơdôm bôh ƀirô mơ̆ng Khua pơ ala mơnuih ƀôn sang dêh čar, ƀirô gah Jơnum min apăn bruă Khua pơ ala mơnuih ƀôn sang dêh čar, Anom bruă Khua pơ ala mơnuih ƀôn sang dêh čar.

Khua git gai pơ ala mơnuih ƀôn sang dêh čar ta ơi Trần Thanh Mẫn ngă Khua grŭp črâo ba klah čun ngă tui Tơlơi pơtrun pơsit mrô 18 ƀơi hơdôm bôh ƀirô mơ̆ng Khua pơ ala mơnuih ƀôn sang dêh čar. Grŭp črâo ba pơpha bruă ding kơna Grŭp hăng čih pơkra, mă yua tơlơi pơkă mă bruă, kơčăo bruă pok pơhai ngă tui. Amăng anun jao kơ Grŭp hyu mă bruă Khua pơ ala lĕ Ƀirô apăn bruă mơ̆ng Grŭp črâo ba, ƀing ding kơna Grŭp ngă tui bruă jao tui tơlơi pơpha bruă mơ̆ng Khua Grŭp; djru bruă Grŭp hmâo Grŭp čih dăp hơdră yua kơ Grŭp črâo ba pơsit pơjing. Grŭp črâo ba dưi mă yua tom pŏng mơ̆ng Jơnum min apăn bruă Khua pơ ala mơnuih ƀôn sang dêh čar pioh djru bruă mă; Grŭp črâo ba mă bruă tui hơdră pơkă gơgrong ba hlâo./.