Tui hăng tơlơi jŭ yap mơ̆ng Ding jum Ngă hmua hăng ayuh hyiăng, truh ră anai hơmâo 18 tơring čar, ƀôn prong bơbeč yua kơthel hăng ia ling dăo ngă tal 10 phrâo anai. Kơthel tal 10 ngă kơ boh ƀiă 34 čô mơnuih djai hăng 20 čô mơnuih rơngiă aka ƀu ĕp ƀuh truh ră anai; hrŏm hăng anun hơmâo 40 čô mơnuih pơkŏn rơka rơkač. 153 boh sang dlưh hlao; rơbêh 154.000 boh sang pok bơbung hăng răm rai.

Bruă ngă hmua pla pơjing ăt răm ƀăm prong, giăm 49.000 ha hmua pơdai hăng phun pla ƀiă hrơi blan ia lip; 1.524 drơi hlô mơnong rông, jing rơmô kơbao bui bê, 381.000 drơi mơnŭ bip djai hăng ia kor đuăi. Kiăng kah pơpha djru ba tơlơi tơnap mơ̆ng mơnuih ƀôn sang dŏ ƀơi kual ia ling dăo truh, pơdah rai pran jua tơlơi khăp djru ba tơdruă amăng mông tơnap tap, hla hnil gôm ba hla tơ̆I, Jơnum min apăn bruă phun pơ ala mơnuih ƀôn sang dêh čar, pơphun jơnum, jak iâu pơčruh prăk kông ngăn djru ba mơnuih ƀôn sang kual ia ling dăo ngă. Tui hăng anun, Jơnum min apăn bruă phun pơ ala mơnuih ƀôn sang dêh čar jak iâu abih bang khua mua, mơnuih apăn bruă pơčruh gơnam prăk, hơmâo pơhrui glăi 600 klăk prăk.