Mơguah lơ 22/9, Ping gah tơring čar Khánh Hòa pơphun Jơnum ruah khua ping gah tal sa, rơwang bruă 2025-2030, hơmâo Khua git gai pơ ala mơnuih ƀôn sang dêh čar ơi Trần Thanh Mẫn nao pơhmư̆, hrŏm hăng ƀing khua ding jum, anom bruă hăng 396 čô khua pơ ala. Pơhiăp git gai mông jơnum, Khua git gai pơ ala mơnuih ƀôn sang dêh čar bơni kơ hơdôm boh tŭ yua mơ̆ng tơring čar Khánh Hòa hơmâo ngă amăng 5 thun rơgao, lăi pơtŏng Jơnum ruah khua jing bruă kơđi čar yôm biă mă, pok rai tơlơi đĭ kyar phrâo.

Ơi Trần Thanh Mẫn - Khua git gai pơ ala mơnuih ƀôn sang dêh čar pơƀuh 6 bruă mă phun, amăng anun bruă yôm lĕ akŏ pơjing Ping gah, anom bruă čar mă bruă tơpă sit, kjăp kơtang hăng bruă ruah mơnuih mă bruă jing “gai kăl mơ̆ng gai kăl”, jing bruă phun akŏ amăng djŏp tơlơi phun akŏ. Khánh Hòa kiăng pơtrut tui tơlơi gêh gal mơ̆ng ia rơsĭ glông giăm 500km, hơmâo lu kual tong wing hăng bul pơtâo, biă ñu hơmâo plao ia rơsĭ Trường Sa, kiăng pơđĭ kyar bơwih ƀong mơ̆ng ia rơsĭ, apui lơtrik, pơkra gơnam, pơkra măi mok, logistics, hăng hyu čuă ngui hmư̆ hing ƀơi jar kmar, pơsit tơlơi kơdrưh kơ-ang phrâo amăng hrơi mông pơplih hăng mut hrŏm.