Ƀơi anai, Ơi Vương Đình Huệ bưp Khua apăn akŏ ƀôn prong Burgas Dimitar Nikolov hăng ƀing kơ-iăng khua ƀôn prong, khua mua hơdôm  anom bruă amăng ƀôn prong. Ơi Vương Đình Huệ pơsit tong, amăng rơbêh 73 thun laih rơgao, Việt Nam lêng kơ lăng yôm hơdôm tơlơi gum djru mơng Bulgaria lăi hrŏm hăng mơng ƀôn prong Burgas lăi phara. Amăng tal nao čuă sit nik anai, amăng hơdôm mông jơnum hăng Khua pơ ala mơnuih ƀôn sang dêh čar, Khua mir sir hăng Khua dêh čar, hrŏm hăng hơdôm tal jơnum pơƀut pơkŏn, dua bơnah lêng kơ tŭ ư kơtưn tơlơi rô nao rai, ngă hrŏm amăng djop mơta bruă hluai tui Ping gah, Kơnuk kơna, Ƀirô Khua pơ ala mơnuih ƀôn sang dêh čar, pơbưp nao rai mơnuih ƀon sang hăng mơnuih ƀon sang, ƀon lan hăng ƀon lan.

Khua git gai pơ ala mơnuih ƀôn sang dêh čar hơmâo lăi pơthâo brơi Khua apăn akŏ ƀôn prong Burgas kơ tơring čar Quảng Ninh ră anai, anai lĕ sa amăng hơdôm boh ƀon lan hơmâo bruă pơđĭ kyar tañ hloh ƀơi Việt Nam; hăng brơi thâo, tơdơi kơ tal nao čuă amra git gai tơring čar Quảng Ninh tañ tô glăi hơdôm bruă mă mơng dua bơnah; laih dong rơkâo Khua apăn akŏ ƀôn prong hăng ƀing ding kơna rai čuă Việt Nam, nao čuă tơring čar Quảng Ninh kiăng pơtrut tơlơi rô nao rai kơplah wah dua ƀon lan, sit biă ñu amăng bơwih brơi tuai čuă ngui.