VOV4.Jarai-Ngă tui tơlơi pơtrun jơnum lok kah tơđar, lơ 29/9, ơi Vương Đình Huệ, Khua git gai pơ ala mơnuih ƀôn sang dêh čar hăng grup khua mua pơ ala mơnuih ƀôn sang dêh čar ƀôn prong Hải Phòng hơmâo bưp mơnuih ƀôn sang tơring glông Thủy Nguyên, Hải Phòng hlâo kơ jơnum lok 4, tal 15. Ƀơi mông bưp, mơnuih ƀôn sang tơring glông Thủy Nguyên, ƀôn prong Hải Phòng đăo kơnang hăng hok mơak mơ̆n ƀuh lu tơlơi pơđĭ kyar lŏn ia; kơnang kơ ping gah git gai, kơnang kơ khua mua pơ ala mơnuih ƀôn sang, kơnuk kơna dêh čar ƀơi anăp tơlơi tơnap tap yua klin kheng Coid 19 ngă samơ̆ dưi git gai, pơčrâo bruă ba lŏn ia ta ăt pơhrui glăi boh tơhnal tŭ yua lu mơ̆n.

 Khua mua pơ ala mơnuih ƀôn sang dêh čar hơmâo jơlan hơdră kơtang, djơ̆ lăp kiăng pơsir hĭ tơlơi tơnap tap mơ̆ng mơnuih ƀôn sang hăng anom bruă sĭ mơdrô. Lăi glăi tơlơi tơña mơ̆ng mơnuih ƀôn sang amăng bruă ia jrao, amăng anun rơkâo khua mua pơ ala mơnuih ƀôn sang kơ jơlan hơdră pơkă rơnoh ia jrao, pơhlôm djop ia jrao ba sĭ mơdrô hăng pơjrao duăm ruă, Khua git gai pơ ala mơnuih ƀôn sang dêh čar ơi Vương Đình Huệ lăi lĕ, thun blan rơgao, hơmâo lu tơlơi pơgôp hiăp lăi nao kơ tơlơi ngă amưng hăng anŏ aka ƀu klă amăng bruă anai. Khua mua pơ ala mơnuih ƀôn sang dêh čar, Kơnuk kơna glăk git gai pơčrâo ba hơdră kiăng pơhlôm djop, tŭ yua hăng rơnoh ia jrao pioh pơjrao duăm ruă.

 Nay Jek: Pơblang