Ƀơi Ƀirô mă bruă, Khua git gai pơ ala mơnuih ƀôn sang dêh čar ơi Vương Đình Huệ hơmâo mông jơnum bơkơtuai sit nik hăng Khua git gai pơ ala mơnuih ƀôn sang gơnong glông dêh čar Bỉ Stephanie D’Hose. Dua čô khua lăng yôm hơdôm boh than dưi ngă amăng tơlơi rô nao rai ngă hrŏm bơwih ƀong huă kơplah wah dua bơnah amăng thun blan laih rơgao. Khua git gai pơ ala mơnuih ƀôn sang dêh čar ơi Vương Đình Huệ brơi thâo, hăng tơlơi gal ngă hrŏm dua bơnah amăng sĭ mơdrô-tuh pơ alin dŏ lu biă mă. Amăng hrơi blan hơdôm boh dêh čar glăk kiăng sĭ mơdrô gơnam tam nao rai, dua bơnah kiăng tŏ tui ngă hrŏm amăng pơdŭ pơdŭ pơgiăng tui ră anai hăng akŏ pơjing hơdôm glông pơgiăng nao rai phrâo.

Khua git gai pơ ala mơnuih ƀôn sang dêh čar rơkâo, dêh čar Bỉ ngă gêh gal kiăng gơnam tam mơng Việt Nam dưi ba nao sĭ pơ dêh čar Bỉ hăng EU, sit biă ñu akan hơdang, gơnam đang hmua mơng Việt Nam anun lĕ braih pơdai, kơphê… Lăi pơtong, bruă pơplih yua boh thâo phrâo hăng apui lơtrik phrâo lĕ 2 bruă phun amăng tar ƀar rŏng lŏn tơnah hăng dêh čar Bỉ lĕ dêh čar pơđĭ kyar hloh amăng 2 mơta bruă anai. Khua git gai pơ ala mơnuih ƀôn sang dêh čar ơi Vương Đình Huệ čang rơmang Ƀirô Khua pơ ala mơnuih ƀôn sang dêh čar Bỉ pơlăi nao rai tơlơi găn rơgao amăng pơjing hơdră bruă hăng Ƀirô Khua pơ ala mơnuih ƀôn sang dêh čar Việt Nam.