Bruă ngă anai dưi pơƀuh nao rai amăng tivi hăng 57 anih jơnum anom bruă khua git gai tơhan pơgang guai dêh čar djop tơring čar, ƀôn prong, puih kơđông ƀơi kual ataih, bul pơtâo ia rơsĭ. Pơ ala kơ khua mua ping gah, kơnuk kơna, Khua git gai pơ ala mơnuih ƀôn sang dêh čar, Vương Đình Huệ lăng yôm hăng bơni biă mă hơdôm boh tơhnal mơ̆ khua mua, ling tơhan pơgang guai dêh čar hơmâo ngă thun blan rơgao; laih dơ̆ng, bơni hơ-ơč kơ tơlơi gir run, bruă mă hur har hăng tơlơi tŭ añ yua tơnap tap prong samơ̆ dŏ mă bruă kret kruai ƀơi ataih, ƀliah pơ guai dêh čar, ƀu hŭi kơ tơnap tap gleh glar, biă mă ñu amăng bơyan čơkă thun phrâo phang bơnga, sit truh bơyan ƀong têt.

Thun blan pơ anăp, Khua git gai pơ ala mơnuih ƀôn sang dêh čar, Vương Đình Huệ, rơkâo ƀing ling tơhan pơgang guai dêh čar ăt pơtô brơi tong ten, pok pơhai tơpă tơlơi pơtrun, hră pơčrâo trun mơ̆ng Ping gah, jơlan hơdră mơ̆ng kơnuk kơna kơ bruă pơgang lŏn ia, tơlơi rơnuk rơnua kơ mơnuih ƀôn sang. Ƀrô djơ̆ tal anai, Khua git gai pơ ala mơnuih ƀôn sang dêh čar mơ-it hiăp pơpŭ hăng gơnam brơi kơ djop puih kơđông tơhan pơgang guai dêh čar dŏ ƀơi anih tơnap tap, ataih hloh, hơdôm puih kơđông tơhan rông ba čơđai drit druai, ƀing tơnap tap dŏ amăng puih kơđông mơtam hăng 354 čô ană amôn jing ană rông mơ̆ng puih kơđông tơhan pơgang guai dêh čar.