Ƀơk gơnam brơi rơbêh 360 boh sang anŏ tui hơdră bruă, mơnuih ngă hơkrŭ, sang anŏ ƀun rin, ƀing djơ̆ jrao hret, kông ñơn, mơnuih mă bruă tơnap tap ƀơi sang gru grua tơring čar Bạc Liêu, Khua git gai pơ ala mơnuih ƀôn sang dêh čar Vương Đình Huệ lăi pơtong, Ping gah, Kơnuk kơna kah hăng Ƀirô Khua pơ ala mơnuih ƀôn sang dêh čar ăt hơmâo hơdră bruă kiăng gir run pơđĭ kyar bơwih ƀong-mơnuih mơnam hăng tơlơi prong hloh lĕ bơwih brơi tơlơi hơdip kơ mơnuih ƀôn sang. Pơ anăp anai, Khua git gai pơ ala mơnuih ƀôn sang dêh čar rơkâo djop gưl Ping gah, gong gai, Jơnum min djop djuai ania mơnuih mơnam Việt Nam hăng djop khul grup amăng tơring čar hruă kjăp, pok pơhai ngă klă tơlơi črâo trun mrô 26 mơng Khul git gai Ping gah kơ bruă pơphun ngui tết Giáp Thìn thun 2024, pơhlôm brơi rơnuk rơnua kơ mơnuih ƀôn sang, bơwih brơi hơdôm sang anŏ tui hơdră djru, sang anŏ ngă hơkrŭ, ƀing mơnuih tơnap tap dưi čơkă thun phrâo pơđao pran jua hăng rơnuk rơnua.

Ăt amăng yang hrơi tlam lơ 25/1, Khua git gai pơ ala mơnuih ƀôn sang dêh čar Vương Đình Huệ hăng grup hyu mă bruă hơmâo bưp ƀô̆ mơta Khul apăn bruă Ping gah tơring čar Bạc Liêu. Khua git gai pơ ala mơnuih ƀôn sang pơtă tơring čar tañ pơjing akŏ bruă, jơlan hơdră bruă mă lăp djơ̆ hăng dưm dăp akŏ pơdong hluai tui bruă pơtrut tuh pơ alin, mă yua djop tơlơi gal amăng tơring čar, pơđĭ kyar bơwih ƀong mơnuih mơnam hăng pơhlôm rơnuk rơnua kual lŏn dăo ia krông Cửu Long truh thun 2030, anăp nao truh thun 2045.