Amăng mông bưp, ƀing khua pơ ala Việt Nam pơ tač rơngiao lăi pơthâo hơdôm tơlơi sit nik amăng bruă mă ƀơi hơdôm anom bruă pơ ala Việt Nam ƀơi hơdôm anih, tơlơi rô nao rai kơplah Việt Nam hăng hơdôm boh dêh čar, lăi pơtong hơdôm boh than dưi ngă prong amăng hơdôm tal nao čuă mơng Khua git gai pơ ala mơnuih ƀôn sang dêh čar Vương Đình Huệ pơ hơdôm boh dêh čar amăng hrơi blan laih rơgao, pơgôp pơtrut tơlơi rô nao rai Việt Nam hăng hơdôm boh dêh čar, ngă dơlăm tui hơdôm bruă ngă hrŏm tui gru grua, jing akŏ phun, pok rai hơdôm bruă ngă hrŏm phrâo.

Đĭ pơhiăp amăng mông bưp, Khua git gai pơ ala mơnuih ƀôn sang dêh čar Vương Đình Huệ pơdah tơlơi hok mơ-ak čơkă ƀing khua anih jưh, Khua anom bruă pơ ala dêh čar Việt Nam pơ tač rơngiao, pơsit tong bruă pơtom hiăp amăng hrơi blan laih rơgao hơmâo lu tơlơi dưi prong, jing tơlơi ngă bơngač amăng hơdôm tơlơi dưi hrŏm amăng lŏn ia ta amăng hơdôm thun laih rơgao. Sit biă ñu amăng hrơi blan jar kmar hơmâo lu tơlơi rung răng ƀu hmao thâo, samơ̆ bruă pơtom hiăp hơmâo ba glăi lu tơlơi dưi mơng dua bơnah, djop bơnah, hơdeč hmar ngă bơkơnar, kjăp phik kiăng pơhlôm rơnuk rơnua pơđĭ kyar, mut hrŏm jar kmar prong ƀiă dong.