Sang măi pơkra kơphê Sơn La hơmâo mrô prăk tuh pơ alin 260 klai prăk, dưi pơkra 50.000 tơn kơphê săt amăng sa thun, dưm dưm hăng 12.500 tơn kơphê pơjeh krô amăng sa thun. Hăng lŏn adai lăp djơ̆ či ngă hmua ba sĭ gơnam, pơƀut prong, tơring čar Sơn La hơmâo pơƀut đĭ kyar phun boh troh, phun tơbâo hăng phun kơphê Arabica. Tơdơi kơ 30 thun pla, truh ră anai tơring čar hơmâo rơbêh 20.000 ha kơphê Arabica, jing 41,2% đơ đam kơphê Arabica amăng dêh čar; jing tơring čar hơmâo anih pla kơphê Arabica prong hloh amăng dêh čar.

Kơ-iăng khua ping gah tơring čar Sơn La ơi Lò Minh Hùng brơi thâo, bruă ba mă yua Sang măi pơkra kơphê Sơn La ƀơi tơring glông Mai Sơn, tơring čar Sơn La lăp djơ̆ hăng jơlan đĭ kyar bơwih ƀong huă - mơnuih mơnam hăng bruă pơhưč tuh pơ alin mơ̆ng tơring čar rơwang thun 2020-2025; jing pơƀuh rơđah kơ bruă ba jơlan hơdră ngă bruă mơ̆ng Ping gah, Kơnuk kơna amăng tơlơi hơdip; hơmâo čang rơmang amra ba glăi tơlơi gêh gal kơ pô tuh pơ alin, pơsir hĭ hơdôm tơlơi lông lăng, aka ƀu djơ̆ amăng bruă đĭ kyar phun kơphê mơ̆ng tơring čar.