Mơguah lơ 1/12, Khua git gai pơ ala mơnuih ƀôn sang dêh čar Vương Đình Huệ git gai mông tŭ jum yôm anai, tơdơi kơ mông čơkă, dua čô khua git gai pơ ala mơnuih ƀôn sang pơphun bơkơtuai. Dua čô khua git gai pơ ala mơnuih ƀôn sang dêh čar pơsit amra pơtrut tui hloh dong tơlơi ngă hrŏm kơplah wah dua boh dêh čar amăng hrơi blan pơ anăp.

Dua bơnah tŭ ư kiăng hơkrŭ kơjăp tui, jê̆ giăm hloh dong, đăo kơnang nao rai; gum ngă klă djŏp Tơlơi lăi pơthâo hrŏm, hơdôm Hră kĭ pơkôl, Hră ngă hrŏm, biă ñu lĕ Tơlơi pơtum glăi amăng mông bưp kơplah wah Khua mua prong dua Ping gah thun 2023, Tơlơi pơtum glăi mông bưp kơplah wah klâo čô khua ping gah Việt Nam - Kur - Lao. Việt Nam - Kur pơtrut tui hloh bruă ngă hrŏm ling tơhan, rơnuk rơnua, lăng anai jing gong tơmeh phun mơ̆ng tơlơi rô nao rai dua bơnah, dưi kơnang nao rai pơhlôm rơnuk rơnua lŏn ia, pơgăn glăi tơlơi lông lăng rơnuk rơnua aka ƀu phiah hơmâo mơ̆ng hlâo; pơtrut ngă hrŏm rơnuk rơnua plang internet; ngă hrŏm man pơdong jơlan guai rơnuk rơnua, hơđong, pơđĭ kyar.