VOV4.Jarai - Mơguah lơ 10/10 ƀơi Sang mă bruă Khua pơ ala mơnuih ƀôn sang gah yŭ tơlơi git gai mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ, Mông jơnum tal 16 mơng Jơnum min apăn bruă Khua pơ ala mơnuih ƀôn sang dêh čar ta pok phun laih. Pơphun amăng 3 hrơi, amăng mông jơnum anai, Jơnum min apăn bruă Khua pơ ala mơnuih ƀôn sang dêh čar ta gum pơhiăp hơdôm bôh yôm phăn pioh lăi pơthâo kơ Khua pơ ala mơnuih ƀôn sang tal jơnum lok 4, Khua pơ ala mơnuih ƀôn sang dêh čar ta tal 15, pơkă hlâo pok phun amăng lơ 20/10 pơ̆ anăp.

Pok phun mông jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah sa bôh yôm phăn amăng mông jơnum anai, Jơnum min apăn bruă Khua pơ ala mơnuih ƀôn sang dêh čar ta amra gum pơhiăp amăng hră čih lăi pơthâo glăi mơng Kơnuk kơna kơ bơwih ƀong – mơnuih mơnam hăng prăk kak ngăn drăp. Ƀơi anăp tơlơi ngă glêh tơnap mơng tơlơi bơwih ƀong rŏng lŏn tơnah, bơ̆ amăng dêh čar ta, hrom hăng hơdôm tơlơi gal, ăt hmâo mơn ƀu ƀiă hơdôm tơlơi akă dưi ngă, tơlơi tơnap hăng tơlơi lông, yua anun, khom pơsit tŏmg ten bôh than ba truh, tơlơi kiăng hrăm, biă ñu tơlơi pơmin pơkă bruă, jơlan gah nao kơ thun 2023, pơtă  Jơnum min apăn bruă Khua pơ ala mơnuih ƀôn sang dêh čar ta lăi pơthâo abih pran jua Jơnum lok 6, hluai tui bôh nik jơlan gah pơplih pơkra prăk blan, prăk pơdơi thun tha, djru gah hră pơgang gah mơnuih mơnam hăng djru kơ mơnuih ngă hơkrŭ đưm amăng thun 2023 kiăng pel ĕp, pơsit./.

VOV.VN čih

Siu H’ Prăk pơblang