Pơhiăp amăng mông bưp ƀô̆ mơta, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, ră anai dêh čar ta hmâo laih khul mơnuih bơwih ƀong đĭ truh ha klăk čô mơnuih; glăk wai lăng, git gai rơbêh kơ 900 rơbâo bôh anom bơwih ƀong, amăng anun 98% lĕ anom bơwih ƀong mơnuih ƀôn sang. Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, Ping gah, Kơnuk kơna ta lăng yôm na nao bruă mă mơ̆ng khul mơnuih bơwih ƀong, anom bơwih ƀong pioh kơ bruă pơđĭ kyar mơ̆ng lŏn ia.

Khua git gai wai lăng pơ ala mơnuih ƀôn sang dêh čar ta lăi rơđah, Tơlơi pơtrun pơsit 41 mơ̆ng Ding jum kơđi čar kơ pơpdŏng hăng ngă tui bruă mă mơ̆ng khul mơnuih bơwih ƀong Việt Nam amăng rơnuk phrâo hmâo ba tơbiă hơdôm tơlơi pơmin, pơsit jơlan gah hăng jơlan pơsir phrâo, kiăo tui kơjăp tơlơi kiăng pơđĭ kyar mơ̆ng mơnuih bơwih ƀong hăng rơkâo mơ̆ng lŏn ia. Yua anun, pơđĭ kyar anom bơwih ƀong djuai ania, kiăng biă pơđĭ kyar khul mơnuih bơwih ƀong Việt Nam hmâo pran jua, bôh thâo, bơwih ƀong sĭ mơdrô djă gru djuai ania, hmâo gơgrong mơnuih mơnam hluai tui bruă pơjing, djă pioh kơnuih ană mơnuih, ngă tui phiăn juăt klă hiam amăng hơdôm bôh sang anô̆ mơnuih bơwih ƀong./.