Hăng giăm truh 60 mơta bruă mă ƀơi dua bôh dêh čar anai, hrơi pơkă kơpal khŏp tơdơi kơ trun mơ̆ng rơdêh por mơtăm, tal nao čuă sit nik pơ̆ dua bôh dêh čar Indonesia hăng nao pơhmư̆ mông Jơnum AIPA tal 44; čuă sit nik dêh čar Iran mơ̆ng Khua git gai wai lăng pơ ala mơnuih ƀôn sang dêh čar ta, ơi Vương Đình Huệ hăng Grŭp khua pơ ala gưl dlông Khua pơ ala mơnuih ƀôn sang dêh čar ta hmâo laih lu bôh tơhnal klă hiam.

Khua pơ ala mơnuih ƀôn sang dêh čar Việt Nam hăng Indonesia hăng Việt Nam – Iran hmâo kĭ laih tơlơi pơkôl gum hrŏm phrâo kiăng djơ̆ hăng hơdôm hrơi tơlơi rô nao rai kơplah wah dua bôh dêh čar ăt kah hăng kơtưn gum hrŏm kơplah wah dua Khua pơ ala mơnuih ƀôn sang, pơlir hơbit kơtưn lăi pơthâo nao rai grŭp, lăi pơthâo nao rai tơlơi găn rơgao amăng hơdôm bruă khua pơ ala mơnuih ƀôn sang ăt kah hăng gum hrŏm bruă lăng tui, gum hrŏm amăng hơdôm bruă bơkơtuai jar kơmar. Hrŏm hăng anun, amăng tal nao čuă anai, hơdôm ding jum gơnong bruă bơdjơ̆ nao ăt hmâo kĭ laih mơn lu tơlơi pơkôl gum hrŏm amăng hơdôm bruă pha ra. Anai lĕ gru pơđôm, jing gru pok phun yôm phăn kơ tơlơi gum hrŏm dua bơnah. Nao pơhmư̆ mông Jơnum AIPA – 44, Khua git gai wai lăng pơ ala mơnuih ƀôn sang dêh čar ta, ơi Vương Đình Huệ ăt hmâo mơn hơdôm bruă bưp dua bơnah kiăng lăi pơthâo nao rai hơdôm bruă pơtrut tơlơi rô nao rai hloh dong hăng hơdôm bơnah amăng kual./.