VOV4.Jarai - Čơtlăm lơ 28/9, Khua git gai wai lăng pơ ala mơnuih ƀôn sang dêh čar ta ơi Vương Đình Huệ tŭ jum Đại tướng Singsuk Singpai, Kơ-iăng Khua git gai wai lăng pơ ala mơnuih ƀôn sang tal sa Khua pơ ala mơnuih ƀôn sang gưl dlông dêh čar Thái Lan ba jơlan hlâo grŭp hyu mă bruă glăk hmâo tal rai čuă, mă bruă kiăng thâo hluh kơ bruă pơgang, pơgăn hăng wai lăng tơlơi hưp ƀong kông ngăn ƀơi dêh čar Việt Nam.

Khua GGWLPA mƀs dêh čar ta tŭ jum Kơ-iăng Khua GGWLPA mƀs tal sa Khua pơ ala mơnuih ƀôn sang gơnong dlông Thái Lan

Bơkơtuai kơ bruă pơgang pơgăn hưp ƀong kông ngăn, tơlơi ngă soh, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, anai lĕ bruă mă phun mơng Ping gah, Kơnuk kơna Việt Nam. Khua git gai wai lăng pơ ala mơnuih ƀôn sang dêh čar ta lăi lĕ, Khua pơ ala mơnuih ƀôn sang Việt Nam hmâo laih hơdôm tơlơi gum hơgôp yôm phăn amăng bruă pơgang, pơgăn hưp ƀong kông ngăn, hrom hăng anun lăi rơđah, anai lĕ bruă mă mơ̆ Khua pơ ala mơnuih ƀôn sang dua bôh dêh čar amra kơtưn gum hrom pơ̆ anăp anai. Ơi Singsuk Singpai čang rơmang, tơlơi rô nao rai kơplah dua bôh dêh čar hăng mơnuih ƀôn sang dua bôh dêh čar jai hrơi jai pơđĭ kyar kơjăp phik hloh; dua grŭp khua pơ ala mơnuih ƀôn sang giăng mah dua bôh dêh čar kơtưn dong hơdôm tal čuă nao rai, pơbưp, bơkơtuai tơlơi găn rơgao bruă mă./.

VOV.VN čih

Siu H’ Prăk pơblang