Ră ruai hăng mơnuih apăn bruă tơhan, ling tơhan Trung đoàn Tơhan rơdêh por 921, Khua git gai wai lăng pơ ala mơnuih ƀôn sang dêh čar ta Vương Đình Huệ lăi rơđah, găn rơgao 60 thun pơdŏng, kơdŏng blah hăng pơjăp kơtang, hơdôm rơnuk mơnuih apăn bruă tơhan, ling tơhan mơ̆ng Trung đoàn 921 ƀu pơdơi gir run, pơhrăm pô hăng kơjăp kơtang; ba glăi lu bôh than prong, ư-ang amăng bruă pơdŏng hăng pơgang lŏn ia.

Pơ̆ anăp anai, Khua git gai wai lăng pơ ala mơnuih ƀôn sang dêh čar ta rơkâo Trung đoàn lăi pơthâo abih, pok pơhai tơpă hơdôm tơlơi črâo ba, tơlơi pơtrun pơsit mơ̆ng Ping gah, hơdră bruă, tơlơi phiăn mơ̆ng Kơnuk kơna kơ bruă pơgang lŏn ia - rơnuk rơnua plơi pla. Rim mơnuih amăng bruă tơhan, ling tơhan khom ngă tui dong pran jua “Ling tơhan Wa Hồ”, hăng bruă kơđi čar kơjăp, pran pơsit kơdŏng blah prong, amra čơkă hăng ngă giong klă bruă jao, ha pran jua hăng Lŏn ia./.