Mơguah lơ 21/8, Khua git gai wai lăng pơ ala mơnuih ƀôn sang gơnong dlông dêh čar Bơl-gum Stéphanie D’Hose hrŏm hăng Grŭp khua pơ ala kơ dêh čar Bơl-gum rai truh laih pơ̆ tơdrŏn rơdêh por Nội Bài (Hà Nội), pơphun tal rai čuă sit nik dêh čar Việt Nam mơ̆ng lơ 21-25/8/2023 tui tơlơi jak iâo mơ̆ng Khua git gai wai lăng pơ ala mơnuih ƀôn sang dêh čar ta, ơi Vương Đình Huệ. Việt Nam hăng Bơl-gum pơdŏng bruă pơtom hiăp thun 1973. Yap mơ̆ng hrơi pơdŏng bruă pơtom hiăp, tơlơi rô nao rai giăng mah mơ̆ng hlâo hăng gum hrŏm klă hiam kơplah wah dua bôh dêh čar glăk pơđĭ kyar klă dong. Khua git gai wai lăng pơ ala mơnuih ƀôn sang gơnong dlông dêh čar Bơl-gum Stéphanie D’Hose lĕ tuai gưl dlông hloh mơng Bơl-gum rai čuă dêh čar Việt Nam amăng thun 2023.

Anai ăt lĕ tal dua bôh dêh čar hơdor glăi 50 thun Hrơi pơdŏng bruă pơtom hiăp (22/3/1973 – 22/3/2023) hăng 5 thun Gum hrŏm bruă đang hmua. Tal rai čuă anai pơdah tơlơi lăng yôm mơng khua git gai lŏn ia Bơl-gum amăng tơlơi rô nao rai hăng Việt Nam hăng tô̆ tui tal čuă jơmư mơ̆ng Khua git gai wai lăng pơ ala mơnuih ƀôn sang dêh čar ta, ơi Vương Đình Huệ amăng blan 9/2021. Tal nao čuă kiăng pơtrut gum hrŏm bơwih ƀong sĭ mơdrô hăng tuh pơplai ăt kah hăng gum hrŏm kơplah wah Khua pơ ala mơnuih ƀôn sang Việt Nam hăng dêh čar Bơl-gum; kơtư̆n tơlơi gum hrŏm kơplah wah dua bôh dêh čar amăng hơdôm mông bơkơtuai lu bơnah kah hăng Sang gum hơbit djop dêh čar, hơdôm khul grŭp pơlir hơbit khua pơ ala mơnuih ƀôn sang amăng kual hăng jar kơmar./.