Hrơi tom brơi (22/11), Grŭp khua pơ ala mơnuih ƀôn sang tơring čar Daklak pơhun jơnum bưp mơnuih ƀôn sang tơdơi kơ tal jơnum lok 4, Khua pơ ala mơnuih ƀôn sang dêh čar ta tal 15. Ding kơna git gai Ping gah dêh čar, Khua Grŭp pơtô ba mơnuih ƀôn sang Ping gah dêh čar ta yă Bùi Thị Minh Hoài hmâo bưp mơnuih ƀôn sang ƀơi tơring glông Čư̆ Mgar hăng plơi prong Buôn Ma Thuột.

Ƀơi hơdôm anih bưp, mơnuih ƀôn sang pơdah pran jua mơ-ak ƀơi anăp hơdôm bôh tơhnal dưi ngă amăng tal jơnum lok 4, Khua pơ ala mơnuih ƀôn sang dêh čar ta tal 15. Biă ñu, Khua pơ ala mơnuih ƀôn sang hmâo pel ĕp laih Tơlơi pơtrun pơsit kơ pơphô sa dua hơdră pơkă, hơdră bruă pha ra pơđĭ kyar plơi prong Buôn Ma Thuột. Amăng mông bưp, mơnuih ƀôn sang ăt rơkâo mơn hơdôm bôh yôm bơdjơ̆ nao hơdră bruă djru kơ mơnuih djru ngă hơkrŭ đưm, pơsir hơdôm ring bruă pơdŏng ngă soh, hră pơgang gah ia jrao kơ sang anô̆ ƀun rin, tơlơi kơmok pruai ƀu klă hiam bơbeč truh phun pla, jơlan nao rai plơi pla răm tui khom dưi đing nao tuh pơplai pơkra glăi./.