Tui hăng anŏ pơtong glăi ƀơi mông jơnum, mah dŏ lu tơlơi tơnap tap, samơ̆ hăng tơlơi gir run mơ̆ng abih glông bruă kơđi čar, tơring čar Gia Lai ăt hơđong mơ̆n. 14/21 tơhnal pơkă kơ bơwih ƀong huă mơnuih mơnam dưi ngă hăng đĭ lu hloh akŏ bruă pơkă. Jơnum lok anai, jơnum min pơ ala mơnuih ƀôn sang tơring čar Gia Lai amra sem lăng djop hră lăi pơthâo bruă mă thun 2023 hăng anăp ngă bruă amăng thun 2024 mơ̆ng ƀing pơ ala mơnuih ƀôn sang tơring čar, jơnum min mơnuih ƀôn sang tơring čar.

Biă mă ñu, tal jơnum anai plĕ hră đăo kơnang kơ mơnuih apăn bruă yua kơ ƀing pơ ala mơnuih ƀôn sang tơring čar pô ruah laih anun lăi glăi djơ̆ tui hăng tơlơi pơtrun mơ̆ng tơlơi phiăn. Đĭ pơhiăp amăng mông jơnum, Y Thanh Hà Niê Kdăm Khua jơnum min djuai ania gah anom bruă pơ ala mơnuih ƀôn sang dêh čar čang rơmang ƀing pơ ala mơnuih ƀôn sang tơring čar Gia Lai ăt gir run kiăo tui ngă djơ̆ khut khăt hơdôm hơdră pơtrun bơwih ƀong huă mơnuih mơnam; pơsir hĭ hơdôm tơlơi dŏ gun, kơđông kiăng ngă klă bruă jao; pơtum ngă tui 3 hơdră bruă mơ̆ng dêh čar pơtrun; git gai khut khăt amăng bruă mă ba yua rơnoh prăk tuh pơ alin kơ bruă čar.