Tơdơi kơ hmư̆ tơlơi pơgôp hiăp, gah Kông ti pơčruh ngăn kơphê Thắng Lợi, pơ ala kơ gong gai, hơdôm gơnong bruă, anom bruă bơdjơ̆ nao hơmâo lăi glăi rơđah hăng rim tơlơi rơkâo đĭ, pơblang rơđah tơlơi phiăn bơdjơ̆ nao lŏn ia, hră pơ-ar gơgrong ngă bruă hăng dưm dăp, pơplih phrâo hơdôm boh kông ti ngă hmua, pla kyâo glai. Khă hnun hai, sang anŏ čơkă gơgrong ngă bruă lăi tơlơi lăi glăi aka ƀu djơ̆ pran ƀing gơñu ôh, khŏm kiăng hơmâo Khul hơduah ĕp kơđi Kơnuk kơna pel ĕp sem lăng, pơsir brơi hơdôm tơlơi aka ƀu djơ̆ kơplah wah mơnuih ƀôn sang hăng kông ti.

Pơđut mông pơhiăp tom, ơi Phạm Ngọc Nghị, Kơ-iăng khua ping gah tơring čar, Khua Jơnum min mơnuih ƀôn sang tơring čar pơhmư̆ hơdôm tơlơi lăi pơthâo mơ̆ng kông ñơn, sang anŏ gơgrong wai lăng mă bruă mơ̆ng Kông ti kơphê Thắng Lợi ba tơbiă, laih dong brơi thâo hơmâo laih hră pơ-ar rơkâo Khul hơduah ĕp kơđi Kơnuk kơna pel ĕp sem lăng abih bang Kông ti pơčruh ngăn kơphê Thắng Lợi.