Khua Jơnum min pel ĕp kơđi tơlơi Ping gah dêh čar ta Trần Cẩm Tú hmâo ƀơk laih 50 anung gơnam kơ hơdôm bôh sang anô̆ gah hơdră bruă, sang anô̆ ƀun rin mơ̆ng plơi prong Lào Cai; 50 anung gơnam kơ mơnuih mă bruă hmâo tơlơi hơdip tơnap hăng gơnam brơi kơ hơdôm khul ling tơhan tơring čar Lào Cai. Pơhiăp amăng tal nao čuă, ơi Trần Cẩm Tú pơsit yôm tơlơi gum hrŏm hơbit, gir run mơ̆ng Lào Cai amăng 1 thun 2023 lu tơlơi tơnap, tơlơi lông.

Hrŏm hăng anun, rơkâo gưl ping gah, gong gai, Jơnum min djop djuai ania mơnuih mơnam, hơdôm khul kơđi čar – mơnuih mơnam hơdôm gưl tơring čar Lào Cai khom đing nao črâo ba ngă tui klă Tơlơi črâo ba mơ̆ng Grup git gai ping gah kơ bruă pơphun Tết tui phiăn juăt Giáp Thìn thun 2024; pơphun ngă tui ba glăi bôh tơhnal hơdôm hơdră pơtrun, hơdră bruă mơ̆ng Ping gah, Kơnuk kơna gah bruă hơđong tơlơi hơdip mơda, bôh tŭ yua mơnuih mơnam, hrŏm trun rin rơpa, biă ñu hơdôm jơlan hơdră pơkă mơ̆ng lŏn ia pơdong plơi pla phrâo, hrŏ trun ƀun rin kơjăp phik, pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng./.