Ƀơi mông bưp, dua bơnah pơčrong sai lu hơdră ngă hrŏm pok pơhai tơlơi pơkôl pơkă mơ̆ng khua mua pơprong dua ping gah, dua lŏn ia, ăt pơtrut hăng ngă kjăp tui hloh bruă rô nao rai giăng mah pŭ ƀăn, gum hrŏm djop bruă. Khua mir sir rơkâo, thun blan pơ anăp, dua bơnah ngă hrŏm tong ten hloh, prăp lui klă bruă mă pơblih nao rai grup khua mua djop ding jum, anom bruă gơnong dlông, djop tơring čar dua boh lŏn ia čuă jơmư nao rai; pơtrut ngă hrŏm bơwih ƀong huă, pơđĭ tui bruă bơwih ƀong huă sĭ mơdrô; rơkâo dêh čar Khač ăt ngă gêh găl kơ bruă sĭ mơdrô hơdôm gơnam đang hmua mơ̆ng Việt Nam, kơtưn tuh pơ alin ƀơi Việt Nam hăng hơdôm kơčăo bruă pơprong, ba gru hlâo kơ hơdră pơđĭ kyar mơ̆ng dêh čar Khač.

Ƀơi Bắc Kinh, dêh čar Khač, Khua mir sir dêh čar ta, ơi Võ Văn Thưởng ăt hmâo tŭ jum laih Khua Sang prăk tuh pơplai anom mă yua kual ASIA (AIIB) Kim Lập Quần. Amăng mông tŭ jum, Khua mir sir dêh čar ta pơsit yôm AIIB ƀu pơdơi pok prong bruă mă, ba glăi lu bôh than yôm phăn hăng jai hrơi jai pơđĭ tui bruă mă mơ̆ng sa sang prăk pơđĭ kyar lu mơta, gum tơngan hrŏm hơdôm khul grŭp kah hăng WB, ADB... djru ngăn rơnoh djơ̆ tui tơlơi kiăng pơđĭ kyar anom mă yua ƀơi kual ASIA, biă ñu hăng hơdôm bôh dêh čar glăk pơđĭ kyar. Pơ̆ anăp anai, Khua mir sir dêh čar ta rơkâo AIIB gum hrŏm djru hơdôm ding kơna hmâo tơlơi kiăng lu kơ ngăn drăp hăng hơdră mă yua măi mok; pơtrut pơđĭ kyar dong anom mă yua kual ASIA, amăng anun đing nao lơm pơplih mơtah, pơđĭ tui apui yua bŏng glăi hăng pơplih ayuh hyiăng.