VOV4.Jarai - Mơguah lơ 22/9, ƀơi Sang bruă Khua mir sir, Khua mir sir ơi Nguyễn Xuân Phúc bưp ƀing čơđai rơgơi, pơ ala kơ ƀing čơđai 54 phung djuai ania ƀơi djŏp tơring tơrang, nao pơhmư̆ mông Jơnum ngui ngor čơđai muai rơgơi mơbruă djŏp djuai ania tal 4, hơmâo pơphun amăng hrơi anai (lơ 23/9). Ƀơi mông bưp, Khua mir sir ơi Nguyễn Xuân Phúc pơsit, thâo hluh dlăm tơlơi pơmin mơng Khua mir sir Hồ Chí Minh kơ gum pơgôp djuai ania, kơ bruă lăng ba ƀing čơđai muai, Ping gah, Kơnuk kơna hăng mơnuih ƀon sang hơmâo lăng ba na nao yơh, lăng yôm bruă pơgang ba, pơtô brơi ƀing čơđai, biă ñu lĕ čơđai djuai ƀiă, kual čư̆ siăng, kual guai dêh čar, bul pơtâo ia rơsĭ, hơmâo pơdah pơƀuh amăng lu jơlan hơdră djru tañ, tŭ yua.

Khua mir sir dêh čar ta lăi, hăng giăm 16 klăk čô čơđai amăng khul grup, tơdăm ngek dra muai, čơđai anet, anai jing mơnuih glăm ba djŏp bruă hơmâo amăng dêh čar ta tơdơi anai, yua hnun, Khua mir sir kiăng ƀing čơđai gir hrăm hră, bơkơjăp drơi jăn, thâo pơmin, hơmâo pran jua kơjăp đah mơng djru pơđĭ kyar lŏn ia ta pơgi kơdih anai.

Siu H’Mai: Pơblang