Mơguah lơ 8/11, ƀơi Ƀirô mă bruă, Khua mir sir ơi Nguyễn Xuân Phúc bưp ƀô̆ mơta ƀing mơnuih amăng Khul hlăk ai bơwih ƀong sĭ mơdrô Việt Nam ƀrô tal jao pri Pơtŭ mriah - Ƀing hlăk ai bơwih ƀong sĭ mơdrô Việt Nam rơgơi thun 2022. Đĭ pơhiăp amăng mông bưp, Khua mir sir ơi Nguyễn Xuân Phúc lăi pơtong, mah dong ƀơi anăo lu tơlơi tơnap tap samơ̆ ƀing bơwih ƀong sĭ mơdrô Việt Nam amăng anun hơmâo ƀing hlăk ai ƀu rơngiă pran đăo gơnang hăng amra gơgrong tui bruă jao kiăng pơgôp ba glăi tơlơi dưi kơ lŏn ia ta amăng jar kmar.

Khua mir sir lăi rơđah, ƀing ding kơna mơng Khul hlăk ai bơwih ƀong sĭ mơdrô Việt Nam glăk djru brơi bruă mă kơ rơbêh 3 klăk čô mơnuih, pơhrui rĭm thun rơbêh 30 klai đôlar Mi yua anun ƀing hlăk ai thâo bơwih ƀong ƀu djơ̆ glăk glăm ba bruă bơwih ƀong sĭ mơdrô, gum djru mơnuih mơnam, hăng lŏn ia ta đôč ôh ăt lĕ ƀing mơnuih ba jơlan hlâo kiăng pơplih phrâo lŏn ia.