Ƀing pơ ala anai, pơ ala brơi rơbêh 500 čô mơnuih arăng ruah mơ̆ng djop tơring čar, ƀôn prong amăng dêh čar, nao jơnum hơdră pơpŭ bơni kơ ƀing ba gru hlâo jing mơnuih arăng đăo kơnang amăng plơi pla djuai ƀiă thun 2023. Ƀơi mông bưp, lu mơnuih arăng đăo kơnang hơmâo lăi pơthâo hăng khua mir sir laih anun kah pơpha hăng ƀing nao jơnum hrŏm kơ hơdră bơwih ƀong huă laih anun bruă mă sit nik amăng sang anŏ, plơi pla gơñu pô, kah hăng: hrăm tui hơdră bơwih ƀong huă mơ̆ng anih pơkŏn, giong anun glăi pơtô ba, djru mơnuih ƀôn sang amăng plơi pla, jak iâu mơnuih ƀôn sang hur har mă bruă, hrưn đĭ lui rơmŏn kŏn rin, akŏ pơdong khul gum pơgôp djuai ania, lui hĭ tơlơi phiăn ƀu klă ƀu găl hơđăp, jak iâu gum pơgôp man pơdong plơi pla, laih anun pơlir hơbit djop djuai ania....

Hok mơak bưp ƀing arăng đăo kơnang amăng plơi pla djuai ƀiă lơ̆m dêh čar, Khua mir sir Võ Văn Thưởng lăi pơtong, Ping gah, kơnuk kơna đing nao na nao đôč, čih pơkra jơlan hơdră kiăng djru ba tơlơi hơdip mơda mơnuih djuai ƀiă, amăng anun hơmâo lu hơdră dêh čar pơtrun kiăng ngă bruă pơđĭ tui tơlơi hơdip mơda kơ mơnuih ƀôn sang djuai ƀiă. Khua mir sir čang rơmang ƀing tha plơi, khua ƀôn, ƀing arăng đăo kơnang, jak iâu, djru pơtô lăi ană plơi pla djă pioh, pơđĭ tui gru grua hiam đưm djuai ania, kiăng djru hrom ngă pơhưč pran jua, pơlar tui gru grua hiam djop djuai ania amăng dêh čar Việt Nam.