Tŭ ư tơlơi jak iâu mơ̆ng Khua mir sir ơi Võ Văn Thưởng, hrơi anai, lơ 21/8, Khua mir sir dêh čar Kazakhstan, ơi Kassym Jomart Tokayev rai čuă jơmư sit nik Việt Nam. Anai lĕ tal blung a Khua mir sir ơi Tokayev rai pơ Việt Nam lơ̆m ngă khua mir sir, ăt jing tal rai čuă blung a mơ̆ng Khua mir sir dêh čar Kazakhstan amăng 12 thun rơgao, hơmâo boh tŭ yua yôm kiăng pơtrut hloh bruă ngă giăng mah mơak klă Việt Nam-Kazakhstan, biă mă ñu bruă bơwih ƀong huă, sĭ mơdrô.

Amăng tal rai čuă jơmư anai, dua bơnah amra kĭ pơkôl rơbêh 10 pok hră tŭ ư hrŏm, amăng anun hơmâo akŏ bruă ngă hrŏm pơtrut bơwih ƀong huă hăng sĭ mơdrô. Hrŏm hăng anun lĕ tơlơi pơkôl kơ bruă pơhlưh ngă hră pơar visa kơ mơnuih ƀôn sang dua bơnah dêh čar. Mơguah lơ 20/8, Khua mir sir dêh čar Kazakhstan, ơi Kassym-Jomart Tokayev nao dưm guang bơnga čuă pơsat jep Khua mir sir Hồ Chí Minh. Tơdơi kơ ngă lơphet tŭ jum tui tơlơi phiăn dêh čar ƀơi anom bruă mir sir, Khua mir sir ơi Võ Văn Thưởng hăng Khua mir sir ơi Tokayev hlong bơkơtuai nao rai dua bơnah.