VOV4.Jarai - Pơhiăp amăng mông mă bruă mơng Khul Khua pơ ala mơnuih ƀôn sang ƀôn prong Hồ Chí Minh hăng Jơnum min mơnuih ƀôn sang ƀôn prong amăng čơtlăm 13/10 kơ tơlơi bơwih ƀong – mơnuih mơnam hăng ngă tui Tơlơi pơtrun pơsit mrô 54 mơng Khua pơ ala mơnuih ƀôn sang, Khua mir sir dêh čar ta ơi Nguyễn Xuân Phúc lăi lĕ, truh mông anai, ƀôn prong Hồ Chí Minh kiăng hmâo hơdră pơplih pha ra phrâo hloh kiăng ƀôn prong khin pơmin, khin ngă, pơđĭ kyar hur har hloh.

Khua mir sir pơhiăp amăng mông mă bruă

Gah bruă pok pơhai Tơlơi pơtrun pơsit 54 mơng Khua pơ ala mơnuih ƀôn sang, lăng yôm ƀôn prong Hồ Chí Minh hmâo pok pơhai ba glăi bôh tơhnal Tơlơi pơtrun pơsit, samơ̆ Khua mir sir dêh lăi lĕ, ƀôn prong ăt akă ngă tui ha amăng plĕ mơn hơdôm hơdră pha ra, hrom hăng anun bâo glăi črâo ba mơng Khua git gai Ping gah dêh čar ơi Nguyễn Phú Trọng amăng mông mă bruă hăng ƀôn prong phrâo anai lĕ khom pơsit bruă ngă tui Tơlơi pơtrun pơsit 54, mơng anun ba tơbiă hơdôm hơdră pơkă pha ra, phrâo hloh pioh djru ƀôn prong pơđĭ kyar kơtang hloh./.

VOV.VN čih

Siu H’ Prăk pơblang