VOV4.Jarai - Hmư̆ tui tơlơi jak iâu mơng Khua mir sir dêh ta ơi Nguyễn Xuân Phúc, Khua mir sir dêh čar Singapore Halimah Yacob hrom hăng rơkơi ñu ba jơlan hlâo grŭp khua pơ ala gưl dlông Singapore rai čuă dêh čar Việt Nam mơng lơ 16-20/10/2022. Mơguah kơ 17/10/2022, ngă lơphet čơkă dưi pơphun yôm phăn ƀơi Anih mă bruă mir sir dêh čar. Tơdơi kơ mông ngă lơphet mơtăm, Khua mir sir dêh čar ta ơi Nguyễn Xuân Phúc hmâo bơkơtuai laih hăng Khua mir sir dêh čar Singapore.

Dua Khua mir sir lăng hmư̆ mông ngă lơphet kĭ pơkôl, jao sa dua mơta hră pơ-ar gum hrom dua bôh dêh čar

Amăng mông bơkơtuai, lăi pơthâo kơ sa dua jơlan gah gum hrom prong pơ̆ anăp anai, dua bơnah tŭ ư kơtưn đĭ dong bruă bơkơtuai nao rai grŭp gưl dlông hăng djă pioh bôh tŭ yua hơdôm hơdră gum hrom phun amăng hơdôm glông pôr Ping gah, Kơnuk kơna, Gong gai, Khua pơ ala mơnuih ƀôn sang hăng bơkơtuai mơnuih ƀôn sang, gum hrom anom bơwih ƀong. Khua mir sir dêh čar ta rơkâo Singapore ngă gal brơi pok pơhư hloh dong kơ gơnam tam Việt Nam kah hăng bruă đang hmua, akan hơdang, rơngaih mơñam, gơnam ƀong pơkra... ba sĭ ƀơi anih sĭ mơdrô amăng dêh čar Singapore; djru Việt Nam gum hrom dơlăm loh dong amăng bruă pơlir amăng đơ đam rŏng lŏn tơnah. Bơkơtuai kơ tơlơi amăng kual hăng jar kơmar, dua gơñu pơsit glăi laih tơlơi pơmin mơng ASEAN kơ Ia Rơsĭ Ngŏ hăng tơhnal yôm phăn mơng bruă djă pioh tơlơi rơnuk rơnua, hơđong, pơhlôm, mơ-ak klă ƀơi jơlan ia rơsĭ hăng gah rơhuông adai; pơsir mơ-ak klă tơlơi bơrơsua, djơ̆ hăng phiăn jar kơmar, amăng anun hmâo Tơlơi pơkôl Sang gum hơbit djop dêh čar hăng Tơlơi phiăn ia rơsĭ (UNCLOS) 1982./.

VOV/Siu H’ Prăk pơblang