VOV4.Jarai - Mơguah lơ 23/9, ƀơi ƀôn prong Đà Nẵng, Ping gah ƀôn prong Đà Nẵng gum hrom hăng Anom gru grua Khul tơhan, Ƀirô pơtrun bruă tơhan Quân khu 5 pơphun Bơkơtuai bôh thâo phrâo hăng anăn ñu: “70 thun tlaih rơngai Đồn Nhất – Hải Vân Quan – Gru pơđom pioh gru grua đưm, tơlơi găn rơgao pơdŏng bruă blah mơng mơnuih ƀôn sang”.

Khua mir sir dêh čar ơi Nguyễn Xuân Phúc čơphin rŭp djă pioh hrom hăng ling tơhan hơđăp ƀơi mông Bơkơtuai

Amăng gru grua đưm lŏn ia, Tlaih rơngai Đồn Nhất – Hải Vân Quan pioh glăi lu tơlơi găn rơgao hăng tơlơi hrăm tui yôm phăn kơ khul ling tơhan Liên khu 5 amăng ha rơnuk blah kơdŏng glăi ayăt Prang hăng Mi sua lŏn ia ta. Bruă tlaih rơngai anai jing gru jơlan yôm kơ bruă blah ayăt mơng khul ling tơhan hăng mơnuih ƀôn sang Khu 5, pok sa jơlan blah phrâo amăng anih anom dlai tlô čư̆ siăng tơnap tap, anih anom dô̆ dŏp mơng ayăt kơjăp phik hăng kơtang; tlaih rơngai Đồn Nhất hmâo pơsit laih tơlơi gum hrom kơjăp kơplah wah bruă khul ling tơhan hăng bruă kơđi čar, kơplah wah bruă blah mơng ling tơhan phun pơkĕ hrom pran kơtang mơng mơnuih ƀôn sang hăng pơđĭ kyar tơhan plơi. Bruă bơkơtuai jing tal kiăng lăng glăi hơdôm tơlơi hrăm yôm phăn amăng dua rơnuk blah ngă sui thun mơng djuai ania, hmâo dong bôh thâo phrâo, ngă rơđah hloh bruă mă mơng hơdră blah ayăt mơng mơnuih ƀôn sang amăng bruă pơgang Lŏn ia./.

Siu H’ Prăk: Pơblang