VOV4.Jarai - Khua mir sir dêh čar ta ơi Nguyễn Xuân Phúc phrâo hmâo mông mă bruă hăng Grŭp apăn bruă Ping gah tơring čar Hưng Yên. Pơhiăp git gai črâo ba amăng mông mă bruă, Khua mir sir dêh čar ta ơi Nguyễn Xuân Phúc lăi đĭ hơdôm anô̆ hmâo, tơlơi gal mơng tơring čar Hưng Yên, anun lĕ anih anom phun kual lŏn dăo ia krông Hồng, lŏn drŏn hiam; gah kual plơi prong jưh jom, jơlan nao rai gêh gal pioh pơđĭ kyar bruă sĭ mơdrô.

Khua mir sir dêh čar ta ơi Nguyễn Xuân Phúc pơhiăp amăng mông mă bruă

Amăng pơsit jơlan gah pơđĭ kyar pơ̆ anăp, Khua mir sir dêh čar ta tŭ ư hăng Ping gah tơring čar kơ bruă ruah 3 tơlơi pơplih phrâo pha ra lĕ pơjing hăng wai lăng pơđĭ kyar tui tơlơi pơkă kual tơring čar; pơđĭ kyar anom mă yua bơwih ƀong – mơnuih mơnam, phun ñu lĕ jơlan nao rai; pơjing khul mơnuih apăn bruă thâo, hmâo bôh thâo kơjăp hăng mơnuih mă bruă kơjăp. Lăi rơđah, bruă bơwih ƀong đĭ kyar prong, pơhrui ngăn drăp ba glăi bôh tơhnal klă, kơnong kơ thun anai pơkă lăng hlâo hmâo 51 rơbâo klai prăk lĕ kiăng biă. Kiăng ngă klă hơdôm bruă ba tơbiă, Khua mir sir dêh čar ta ơi Nguyễn Xuân Phúc rơkâo Ping gah tơring čar Hưng Yên hăng glông bruă kơđi čar hmâo tơlơi pơsit prong hloh dong kiăng amăng ƀrư̆, rim mơnuih ƀôn sang gum hrom pok pơhai./.

VOV.VN čih

Siu H’ Prăk pơblang