Amăng mông bưp pơ ala kơ khua git gai Ping gah, Kơnuk kơna, Khua mir sir dêh čar ta, ơi Võ Văn Thưởng pơdah pran jua mơ-ak bưp ƀô̆ mơta grŭp khua pơ ala mơnuih djru ngă hơkrŭ đưm tơring čar Trà Vinh, pơdah pran jua thâo tơngia dơlăm kơ hơdôm rơnuk nao hlâo kơ hơdôm pran jua tuh rơyuh, pơsăn drơi prong prin amăng bruă tlaih rơngai djuai ania, pơlir hơbit lŏn ia.

Pơtŏng sit Ping gah, Kơnuk kơna gir run lăng ba, bơwih brơi mơnuih djru ngă hơkrŭ đưm, Khua mir sir dêh čar ta rơkâo hơdôm gưl, gơnong bruă, Ping gah, gong gai tơring čar Trà Vinh ngă tui ba glăi bôh tơhnal dong, đing nao hơdră bruă djru gum mơ̆ng Kơnuk kơna pioh kơ bruă anai; pel ĕp dong kiăng ƀu lui raih hlơi hmâo gum ngă hơkrŭ đưm mơ̆ akă dưi čơkă mă hơdră bruă mơ̆ng Kơnuk kơna, samơ̆ ăt ƀu pioh mơn hơdră bruă gum djru ƀu djơ̆ mơnuih. Khua mir sir dêh čar ta lăi rơđah, bruă ngă tui klă hơdră bruă djru mơnuih gum ngă hơkrŭ đưm ƀơi tơring čar Trà Vinh ăt lĕ sa jơlan gah pioh kơtưn gum hrŏm hơbit djuai ania, biă ñu ƀơi Trà Vinh hmâo lu neh wa djuai ania tuh rơyuh pran jua kơ bruă hơkrŭ./.