Ƀrô djơ̆ tal hơdor glăi Hrơi mơnuih bơwih ƀong Việt Nam, lơ 13/10, anăp nao hơdor glăi 9 thun hrơi pơdŏng Khul đah kơmơi bơwih ƀong Việt Nam lơ 19/10 hăng Hrơi pioh kơ đah kơmơi Việt Nam lơ 20/10, čơtlăm lơ 5/10, ƀơi Anih mă bruă Khua mir sir, Khua mir sir dêh čar ta, ơi Võ Văn Thưởng bưp ƀô̆ mơta Grŭp 90 čô đah kơmơi bơwih ƀong mơbruă mơng Khul đah kơmơi bơwih ƀong Việt Nam.

Lăi rơđah, Ping gah, Kơnuk kơna đing nao biă, ngă gal brơi kơ tơlơi pơđĭ kyar prong kơtang mơ̆ng khul mơnuih bơwih ƀong Việt Nam, amăng anun hmâo đah kơmơi bơwih ƀong sĭ mơdrô, Khua mir sir dêh čar ta čang rơmang Khul đah kơmơi bơwih ƀong Việt Nam jing pô djă pioh, pơsur tơlơi čang rơmang ngă pơdrŏng tơpă sit mơ̆ng đah kơmơi, mơ̆ng đah kơmơi bơwih ƀong sĭ mơdrô Việt Nam; biă ñu ngă pơhư̆c pran jua prong biă gah tơlơi gir run hrưn đĭ, pơtrut pơsur ƀing hlăk ai ngă pơdrŏng lăp djơ̆. Hăng mrô đah kơmơi dêh čar hmâo 50% mrô mơnuih ƀôn sang hăng giăm truh 50% mrô mơnuih mă bruă lĕ đah kơmơi, Khua mir sir dêh čar ta lăi lĕ, mrô 8.000 čô đah kơmơi bơwih ƀong sĭ mơdrô gum hrŏm Khul bơwih ƀong đah kơmơi akă lăi abih ôh tơhnal gal mơ̆ng pô. Yua anun, Khua mir sir dêh čar ta čang rơmang Khul pok prong hyu djop 63 bôh tơring čar, ƀôn prong. Khua mir sir dêh čar ta, ơi Võ Văn Thưởng ăt rơkâo mơn ƀing đah kơmơi bơwih ƀong sĭ mơdrô gum pơhiăp pơhrŏ trun hơdôm mơta hră pơ-ar ngă gun, ngă brơi bruă tuh pơplai bơwih ƀong sĭ mơdrô gêh gal hloh; djru pơdŏng hơdôm hơdră bruă pơđĭ kyar lŏn ia./.