Amăng rơwang nao čuă Japan, Khua mir sir dêh čar ta Võ Văn Thưởng amăng ƀrư̆ bưp Khua dêh čar hơđăp, Kơ-iăng Khua git gai Ping gah Dân chủ tự do (LDP) Aso Taro, Khua git gai Ping gah Công Minh Yamaguchi Natsuo, Khua git gai Ping gah Cộng sản Japan Shii hăng ƀing  khua pơ ala mơnuih ƀôn sang, ƀing gơyut Japan jê̆ giăm hăng Việt Nam.

Amăng mông tŭ jum, Khua mir sir dêh čar ta Võ Văn Thưởng lăi rơđah, tơlơi rô nao rai Việt Nam hăng Japan hmâo pơđĭ tui kơjăp truh bơnah gum hrŏm pơhlôm akô̆ tlôn yua kơ tơlơi rơnuk rơnua hăng pơdrŏng asah ƀơi ASIA hăng ƀơi rŏng lŏn tơnah hăng glăk dŏng ƀơi tơhnal pioh pơđĭ kyar hloh dong amăng lu bruă, biă ñu hơdôm bruă mă phrâo hăng tơhnal lăng gum hrŏm amăng 50 thun tô̆ tui. Khua mir sir dêh čar ta rơkâo hơdôm bơnah ping gah Japan lăng ba, pơtrut rơđah hơdôm bôh yôm gum hrŏm dua bôh dêh čar amăng rơwang rô nao rai phrâo. Ƀing khua mua, khua pơ ala mơnuih ƀôn sang pơtŏng sit amra gir run abih pran jua pioh djru pơđĭ kyar mơ̆ng tơlơi rô nao rai gum hrŏm Việt Nam – Japan, amăng anun hmâo kơtưn bơkơtuai khua mua hlăk ai, khua pơ ala mơnuih ƀôn sang hlăk ai dua bôh dêh čar./.