Jơnum dưi pơphun tui hơdră lăng nao rai mơ̆ng ataih, anih tô nao rai phun ƀơi ƀôn prong Đà Nẵng hăng giăm truh 800 bôh anih tô nao ƀơi tơring čar, ƀôn prong. Pơhiăp amăng mông jơnum, pơsit yôm Sang phăt kơđi mơnuih ƀôn sang dêh čar hăng abih bang anom bruă phăt kơđi gir run ngă tui klă bruă hmâo jao, Khua mir sir dêh čar rơkâo, gơnong bruă pơtrut kơtang bruă pơdah rơđah kơđi tơlơi, tơlơi pơsit mơ̆ng sang phăt kơđi ngă gru than pioh Mơnuih ƀôn sang hăng hơdôm bôh ƀirô bơdjơ̆ nao lăng tui bruă mă mơ̆ng sang phăt kơđi, kơtưn pran đăo gơnang mơ̆ng Mơnuih ƀôn sang amăng tơlơi tơpă hăng dưm kơnar mơnuih mơnam.

Thun 2023, anô̆ kơjăp, bôh tơhnal bruă pơsir kơđi mơ̆ng hơdôm bôh sang phăt kơđi dưi pơđĭ tui, pơgang klă hloh tơlơi dưi, bôh tŭ yua djơ̆ phiăn mơ̆ng Kơnuk kơna, khul grŭp hăng mơnuih mơnam, djru djă kơjăp hơđong bruă kơđi čar, hơđong, pơhlôm mơnuih mơnam, gum hơgôp klă amăng bruă pơdŏng hăng pơgang Lŏn ia./.