Pơhiăp amăng mông ngă lơphet pok phun, Khua mir sir dêh čar ta Võ Văn Thưởng lăi rơđah ngă tui tơlơi pơtô mơ̆ng Wa Hồ kiăng khăp: “Bơyan bơnga lĕ Tết pla kyâo – Ngă brơi lŏn ia jai hrơi jai klă hiam”, mơ̆ng bơyan bơnga thun 1960 truh ră anai, rim Tết truh bơyan bơnga rai, mơnuih ƀôn sang glăi pơphun “Tết pla kyâo”.

Khua mir sir dêh čar ta čang rơmang pơ̆ anăp anai, hơdôm gưl Ping gah, Gong gai, Jơnum min djop djuai ania mơnuih mơnam dêh čar, khul grŭp hăng Mơnuih ƀôn sang tơring čar Tuyên Quang hăng phiăn juăt plơi pla ngă hơkrŭ ư-ang, hăng čang rơmang pơdŏng plơi pla lŏn ia jai hrơi jai klă hiam hăng pơdrŏng asah, amra hmâo kơčăo bruă hăng bruă ngă rơđah, sit nik, ngă tui dong hơdôm bôh than dưi ngă; rŭ tơgŭ tơhnal gal, bôh tŭ yua mơ̆ng tơring čar kơ kông ngăn glai klô hăng lŏn pla kyâo, nao hrŏm hăng pla phun kyâo pơjing glai, pơgang ba lu mơta sinh học hăng djă pioh gru grua bôh thâo phiăn juăt, pơdŏng plơi pla phrâo, pơđĭ tui anô̆ klă tơlơi hơdip mơda mơnuih ƀôn sang, djru pơdŏng tơring čar Tuyên Quang pơđĭ kyar tañ hăng kơjăp phik./.