Khua mir sir dêh čar ta ơi Nguyễn Xuân Phúc pơsit yôm bruă mă mơng ơi Kambiz Ghawami hmâo lu laih tơlơi gum hơgôp yôm phăn amăng pơtrut gum hrom Việt Nam hăng Đức kơ bruă pơtô pơhrăm mơng lu thun rơgao. Ơi Kambiz Ghawami hăng Khul Djru gum Sang hră Đại học Rŏng lŏn tơnah dêh čar Đức hmâo laih lu bruă mă gum hrom rơđah rơđông hăng lu sang hră, anih anom pơtô pơhrăm ƀơi Việt Nam, rơđah biă ñu lĕ Sang hră Đại học Việt – Đức.

Bơni kơ Khua mir sir dêh čar ơi Nguyễn Xuân Phúc hmâo pioh laih mông tŭ jum, ơi Kambiz Ghawami brơi thâo, čang rơmang na nao pơtrut gum hrom dua bôh dêh čar amăng bruă pơtô pơhrăm. Amăng tal rai čuă anai, ñu hmâo mă bruă laih hăng sa dua anih anom pơtô pơhrăm ba jơlan hlâo ƀơi Việt Nam. Rơgao kơ Khul Djru gum Sang hră Đại học Rŏng lŏn tơnah dêh čar Đức, ala čar Hessen hmâo ƀơk laih sa dua anung prăk djru hrăm hră kơ čơđai gưl dlông Việt Nam./.