Ƀơi San Francisco, dêh čar Mi, amăng Rơwang hrơi tơjuh gưl dlông APEC hmâo pơphun laih Bruă pơbưp ƀing khua mua gưl dlông gum hrŏm bơwih ƀong Ấn Độ Dương – Thái Bình Dương yua kơ tơlơi pơđĭ kyar. Khua mir sir Võ Văn Thưởng ba jơlan hlâo Grŭp khua pơ ala gưl dlông Việt Nam nao pơhmư̆ bruă pơbưp hăng hmâo tơlơi čih, lăi pơthâo tơlơi pơhing kơ pơtrut gum hrŏm bơwih ƀong Ấn Độ Dương – Thái Bình Dương.

Pơhiăp amăng mông pơbưp, Khua mir sir Võ Văn Thưởng lăi rơđah, Rơwang gum hrŏm bơwih ƀong Ấn Độ Dương – Thái Bình Dương yua kơ tơlơi pơđĭ kyar jing tơlơi gir run hrŏm pioh kơtưn gum hrŏm, gum hrŏm kơplah wah hơdôm bôh dêh čar amăng mông rŏng lŏn tơnah bŏng glăi hăng lu tơlơi pơplih, tơhnal gal hăng tơlơi lông plah nao rai. Rơwang gum hrŏm bơwih ƀong Ấn Độ Dương – Thái Bình Dương yua kơ tơlơi pơđĭ kyar dưi čang rơmang lĕ hơdră pơlir nao rai, tô nao rai bơwih ƀong hur har, ba glăi bôh tơhnal, ba glăi bôh tŭ yua sit nik kơ mơnuih ƀôn sang, djru brơi tơlơi rơnuk rơnua, hơđong hăng pơdrŏng asah mơ̆ng kual hăng đơ đam rŏng lŏn tơnah./.