Amăng mông jơnum, Khul hơmâo pơčrông sai hăng pơgôp hiăp bơdjơ̆ nao hơdôm boh tơhnal dưi ngă amăng djop mơta bruă, đăo lăng hlâo bruă amăng jar kmar, amăng kual hăng hơdôm tơlơi bơbeč nao Việt Nam; ba tơbiă boh tơhnal jơlan hơdră, bruă jao thun 2024. Kơ boh tơhnal hơdôm tal jơnum amăng khul thun 2024, Khul tŭ ư pơčrông sai, pơgôp hiăp amăng hơdôm bruă yôm phăn, sui thun bơdjơ̆ nao pơgang rơnuk rơnua, pơtom hiăp, hluai tui anun pơphô bruă, pơgôp hăng Ding jum kơđi čar, Ƀirô Khua pơ ala mơnuih ƀôn sang dêh čar, Kơnuk kơna.

Pơ ala brơi Khul, Khua mir sir Võ Văn Thưởng rơkâo, pơ anăp anai, djop khul ling tơhan, anom bruă bơdjơ̆ nao tŏ tui krăo lăng, gơgrong thâo tong ten, kơsem min, sem lăng, đăo lăng hlâo bruă amăng jar kmar, amăng kual, amăng lŏn ia, mơng anun hmao tlôn pơphô bruă brơi Ping gah, Kơnuk kơna hơdôm hơdră bruă pơsir hĭ, đing nao wai pơgang hơdôm tơlơi pơtrun mơng Ping gah, Kơnuk kơna, kơdong glăi hơdôm bruă ngă ayăt; tŏ tui gru grua, pran kơtang mơng gum pơgôp abih bang mơnuih ƀôn sang amăng pơjing hăng wai pơgang lŏn ia.