Khua mir sir Nguyễn Xuân Phúc čuă dêh čar Thái Lan
Thứ năm, 07:00, 17/11/2022
VOV/Siu H' Prăk pơblang
VOV/Siu H' Prăk pơblang
VOV4.Jarai –Mơguah lơ 16/11, Khua mir sir Nguyễn Xuân Phúc hăng Bơnai ñu hrom hăng Grŭp khua pơ ala gưl dlông Việt Nam truh laih pơ̆ plơi prong jưh jom Bangkok pơphun čuă Thái Lan hăng pơhmư̆ mông Jơnum ƀing Khua mua bơwih ƀong bơkơtuai gum hrom bơwih ƀong kual ASIA hăng Thái Bình Dương tal 29 tui tơlơi jak iâu mơng Khua dêh čar Thái Lan
Čơtlăm tom brơi mơn, Khua dêh čar Thái Lan ơi Pra-yut Chan-o-cha hăng Bơnai ñu git gai mông ngă lơphet čơkă jum Khua mir sir Nguyễn Xuân Phúc hăng Bơnai ñu. Tơdơi kơ anun dua gơñu pơphun mông bơkơtuai kiăng lăi nao hơdôm jơlan gah prong hơkrŭ đĭ dong phun than bruă gum hrom khom ngă kơtưn hăng ngă dơlăm hloh dong bruă rô nao rai dua bơnah.
Dua gơñu ăt lăng mơn mông ngă lơphet kĭ lu hră pơ-ar gum hrom yôm phăn kơplah wah dua bôh dêh čar. Pơkă hlâo, amăng tal nao čuă Khua mir sir Nguyễn Xuân Phúc amra bơkơtuai hăng Khua git gai wai lăng pơ ala mơnuih ƀôn sang dêh čar Thái Lan Chuan Leekpai, bưp ƀô̆ mơta hơdôm anom bơwih ƀong mơbruă mơng dua bôh dêh čar hăng khul mơnuih Việt Nam dô̆ ƀơi Thái Lan./.
Viết bình luận