Tơdơi kơ ngă lơphet čơkă jum, Khua mir sir ơi Lương Cường hăng Khua khul pơlir hơbit kual Mi kô̆, ơi Antonio Costa pơphun jơnum bơkơtuai nao rai. Ƀơi mông bơkơtuai, Khua mir sir ơi Lương Cường brơi thâo: Tơlơi rô nao rai ngă giăng mah Việt Nam-EU hlăk pơđĭ kyar hiam klă, tŭ yua hăng hlom bom.

Tơlơi đăo kơnang nao rai bruă kơđi čar dưi kơjăp hăng pơđĭ tui na nao đôč hăng EU laih anun hơdôm dêh čar ngă ding kơna amăng kual. Tơlơi bơwih ƀong huă-sĭ mơdrô-tuh pơ alin jing pran kơtang pơtrut kơtang tơlơi ngă giăng mah. Ngă hrŏm amăng bruă pơđĭ kyar prong kah hăng boh thâo ia rơgơi, boh thâo phrâo hăng pơblih pơčeh phrâo, hlăk ngă tui tŭ yua kiăng jing sa tơmeh phun amăng bruă ngă hrŏm, jơlan hơdră ngă hrŏm yom phara biă mă plah wah Việt Nam hăng EU hăng hơdôm dêh čar ngă ding kơna amăng kual. Gah kơ ñu, Khua khul Mi kô̆, ơi Antonio Costa brơi thâo, Việt Nam hăng EU lĕ bơnah ngă hrŏm sa anăp hrup soh, bruă phun lĕ pơpŭ nao rai tơdruă tơlơi phiăn pơkă kơ lu bơnah, tơlơi rơnuk rơnua amăng jar kmar kơnang kơ tơlơi phiăn, tơlơi sĭ mơdrô rơngai hăng pơđĭ kyar kơnang kơ hơdôm atur djơ̆ lăp anai.