Tal čuă jơmư anai mơ̆ng Ơi pơtao Brunei pơsit tơlơi gir khŏm ngă mơ̆ng dua boh dêh čar đĭ tui na nao, ngă dlăm tui tơlơi rô nao rai hăng ngă hrŏm ƀơi djŏp mơta bruă, tơdơi kơ pơđĭ tui laih tơlơi rô nao rai dua bơnah jing Gŏp ngă hrŏm hlom bom djŏp bruă. Laih dong tal rai čuă anai pơƀuh tơlơi pơpŭ, lăng yom, tơlơi ngă giăng mah pŭ ƀăn kjăp phik mơ̆ dêh čar Brunei pioh kơ Việt Nam, kah hăng sa gŏp ngă hrŏm đăo kơnang amăng ASEAN.

Amăng hrơi mông tơlơi Ngă gŏp hlom bom Việt Nam - Brunei glăk đĭ kyar hiam klă, tal čuă jơmư gưl Kơnuk kơna pơ Việt Nam mơ̆ng Ơi pơtao Brunei ngă hơkrŭ tui hăng ngă dlăm hloh tơlơi đăo kơnang kơđi čar, pơtrut ngă hrŏm lu bruă hloh plah wah dua boh dêh čar, amăng anun hơmâo kơđi čar - pơtom hiăp, pơgang lŏn ia - rơnuk rơnua, bơwih ƀong, sĭ mơdrôm tuh pơ alin, pơtô hrăm, gru grua, Halal, pơbưp mơnuih ƀôn sang...Tơdơi kơ mông tŭ jum, Khua mir sir ơi Lương Cường hăng Ơi pơtao dêh čar Brunei ba jơlan ƀing khua pơprong mơ̆ng dua boh dêh čar pơphun jơnum pơčrông sai, pơtŏng glăi bruă ngă hrŏm plah wah dua bơnah hrơi blan rơgao, hăng ba tơbiă hơdră ngă hrŏm pơ anăp anai dong.