Pơ ala kơ khua mua ping gah, kơnuk kơna hăng mơnuih ƀôn sang Viet Nam, Khua mir sir ơi Lương Cường bơni hơ-ơč hăng kah pơpha tơlơi mơak hrŏm hơdôm boh tơhnal prong, tŭ yua amăng gru phun mơ̆ Ping gah, kơnuk kơna hăng mơnuih ƀôn sang dêh čar Lao adơi ayong dưi ngă amăng hơdôm thun rơgao, biă mă ñu 50 thun tui jơlan hơdră pơgang kơnuk kơna dêh čar Lao.

Pơčrâo rơđah tơlơi ngă giăng mah yom phara plah wah Viet Nam hăng Lao, Lao hăng Viet Nam hơmâo ƀing khua mua apăn akŏ mơ̆ng hơđăp dua bơnah pơbŭ đĭ, kah hăng Khua mir sir Hồ Chí Minh, Khua mir sir Kaysone Phomvihane pô ngă atur hlâo; dưi hơmâo hơdôm gưl khua mua tŏ tui djă pioh hăng mơnuih ƀôn sang dua bơnah akŏ pơdong, pơgang lui kơjăp hăng pran jua, tơlơi pơmin, ia hŏu hang pơgang pioh tơlơi ngă giăng mah kơjăp tong ten uơ̆t hăng drah kơtăk mơnuih ƀôn sang dua bơnah, Khua mir sir lăi pơtong, anun jing kông ngăn ƀu thâo pơkă rơnoh ôh, jing tơlơi rô nao rai hơmâo sa đôč mơ̆ng gru phun đưm ƀơi rŏng lŏn tơnah, jing anih kơnang kơjăp pioh kơ djop rơnuk tơdơi adih ăt tŏ tui djă pioh tơlơi ngă giăng mah hiam klă tong ten hing ang kơ tơlơi gum pơgôpprong phara biă mă mơ̆ng dua bơnah.